Elimizde zań shyǵarý qyzmeti sapasy deńgeıiniń tómendeýinen bólek, erekshe qaýipti máselelerdiń biri – ǵylymı mektep sabaqtastyǵynyń qalyptastyrylmaýy. Bul týraly Akademıalyq adaldyq lıgasy jalpy jınalysynyń múshesi Talǵat Nárikbaev "Ózbekstanda zań ǵylymyn damytýdyń jáne zań shyǵarý qyzmetin jetildirýdiń ózekti máseleleri" atty  ǵylymı-praktıkalyq konferensıada málimdedi.

Halyqaralyq konferensıa barysynda basqarma tóraǵasy akademıalyq mansaptyń tartymdylyǵyn joǵarylatýǵa qatysty pikirimen bólisti.

– Qazaqstanda ǵalymdardyń ortasha jalaqysy 129 myń teńgeni (300 AQSH dollary) quraıdy, ıaǵnı eldegi ortasha jalaqydan bir jarym ese az. Ýnıversıtettegi jas zańger-oqytýshynyń jalaqysy korporatıvtik sektordaǵy biliktiligi ózimen teń mamanǵa qaraǵanda 5 ese az, – dedi Talǵat Nárikbaev.

Spıkerdiń aıtýynsha, bul túlekterdiń ýnıversıtetten jappaı ketýine jáne konsaltıńtik nemese halyqaralyq zańgerlik fırmalardan jumys izdeýine ákelip soqtyrady.

– Búgingi tańda Qazaqstandaǵy belgili zańger ǵalymdardyń ortasha jasy – 65 jas. Iaǵnı, bilikti ǵylymı kadrlar qartaıyp jatyr. Sáıkesinshe, daryndy stýdentterdi daıyndaıtyn eshkim joq. Bul vakým óte qaýipti qubylys. Sondyqtan tıisti sharalardy qazirden bastap qabyldaýymyz kerek, – dedi ol.

Konferensıa barysynda spıker joǵaryda atalǵan máseleni sheshý úshin joǵary oqý oryndarynda laıyqty jalaqyny qamtamasyz etý arqyly jas mamandardy ǵylymı ortaǵa belsendi túrde tartý qajet ekenin basa aıtty.